မကွေးအကျဉ်းထောင်မှာ ဧပြီလ ၁၃ ရက်နေ့က အကျဉ်းဦးစီးဌာန ဝန်ထမ်းတွေ နဲ့ အကျဉ်းသားတွေကြား တင်းမာမှုတချို့ ဖြစ်ပွားခဲ့ပြီး နိုင်ငံရေးအကျဉ်းသား နှစ်ဦး သေဆုံးခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် PPNM က ထုတ်ပြန်ပါတယ်။

ဧပြီ ၁၃ ရက် ညနေ ခြောက်နာရီ ဝန်းကျင်မှာ မကွေးအကျဉ်းထောင်ရှေ့မှာ စစ်ကောင်စီတပ် နဲ့ ဒေသ ပြည်သူ့ကာကွယ်ရေးအဖွဲ့တွေ ပစ်ခတ်မှုဖြစ်ပွားနေစဉ် အကျဉ်းထောင်တွင်းမှာလည်း အကျဉ်းသားတွေ နဲ့ ဝန်ထမ်းတွေကြား တင်းမာမှုတွေ ဖြစ်ခဲ့ကြောင်း၊ ထောင်ဗူးဝ နဲ့ ကင်းမျှော်စင်က အကျဉ်းဦးစီးဝန်ထမ်းတွေရဲ့ ပစ်ခတ်မှုတွေကြောင့် ထောင်တွင်းဓမ္မာရုံမှာ နေထိုင်တဲ့ နိုင်ငံရေးအကျဉ်းသား စောရွှေအောင် အပါအဝင် ၂ ဦး အနည်းဆုံးသေဆုံးခဲ့တယ်လို့ ဆိုပါတယ်။

ပစ်ခတ်မှုအတွင်း နိုင်ငံရေးအကျဉ်းသား နဲ့ အကျဉ်းသားတွေ အများအပြား ထိခိုက်ဒဏ်ရာရခဲ့ပြီး (၅) ဦးထက်မနည်း ဆေးကုသခံနေရတယ်လို့ ဆိုပါတယ်။ ထောင်ဝန်ထမ်းတစ်ချို့လည်း ထိခိုက်ဒဏ်ရာ ရခဲ့တယ်လို့ ဖော်ပြပါတယ်။

ဒီ တင်းမာမှုဖြစ်ပွားခဲ့တဲ့ အခြေအနေနဲ့ပတ်သက်ပြီး နိုင်ငံရေးအကျဉ်းသားတွေကို ထောင်တွင်းစုံစမ်း စစ်ဆေးတာတွေ လုပ်နေတယ်လို့လည်း ဆိုပါတယ်။

ဒီကိစ္စနဲ့ပတ်သက်ပြီး စစ်ကောင်စီရဲ့ သတင်းထုတ်ပြန်ရေးအဖွဲ့ဝင် ပြည်ထဲရေးဝန်ကြီးဌာနက ရဲမှူးချုပ်ကျော်လင်းကို RFA က ဆက်သွယ်မေးမြန်းခဲ့ပေမဲ့ ဒီကိစ္စက သူနဲ့ မသက်ဆိုင်ကြောင်း ပြန်လည်ပြောဆိုပါတယ်။ RFA က အကျဉ်းဦးစီးဌာနကို ဆက်သွယ်ခဲ့ပေမယ့် အဆက်အသွယ် မရခဲ့ပါဘူး။