ရန်ကုန်မြို့ အင်းစိန်အကျဉ်းထောင်မှာ အကျဉ်းကျခံနေရတဲ့ ကမာရွတ်မီဒီယာပူးတွဲတည်ထောင်သူ အယ်ဒီတာချုပ် ဦးဟံသာညိန်းနဲ့ ဒါရိုက်တာစတီးတို့ စစ်ကောင်စီရဲ့ လွတ်ငြိမ်းသက်သာခွင့်အမိန့်နဲ့ ဧပြီလ ၁၇ ရက် ဒီနေ့ ပြန်လွတ်လာကြတယ်လို့ သူ့ရဲ့မိတ်ဆွေတွေကပြောပါတယ်။

ပြန်လွတ်လာတဲ့ ဦးဟံသာညိန်းဟာ ကျန်းကျန်းမာမာရှိနေတယ်လို့ သူ့ရဲ့လုပ်ဖော်ကိုင်ဖက်တစ်ဦးဖြစ်တဲ့ ဦးနေသန်မောင်က RFA ကိုပြောပါတယ်။

“လေးနှစ်ကျော်လောက် စောင့်ခဲ့ရတာဆိုတော့ ကျွန်တော်တို့လည်း ဝမ်းသာတာပေါ့ဗျာ။ သူကျန်းကျန်းမာမာ ရှိပါတယ်ဗျ”

မြန်မာနိုင်ငံမှာ စစ်တပ်ကအာဏာသိမ်းပြီးနောက် ၂၀၂၁ ခုနှစ် မတ်လ ၉ ရက်နေ့က ရန်ကုန်မြို့က ကမာရွတ်မီဒီယာရုံးခန်းကို စစ်ကောင်စီတပ်က ဝင်ရောက်စီးနင်းပြီးနောက် ဦးဟံသာညိန်းဟာ ဦးနေသန်မောင်အတူ ဖမ်းဆီးခံခဲ့ရတာပါ။

အမေရိကန်နိုင်ငံသားခံယူထားတဲ့ ကမာရွတ်မီဒီယာတည်ထောင်သူ ဦးနေသန်မောင်ကို ၂၀၂၁ ခုနှစ် ဇွန်လမှာ စစ်ကောင်စီက ပြန်လွှတ်ပေးခဲ့ပေမယ့် ဦးဟံသာညိန်းကိုတော့ ၂၀၂၂ ခုနှစ် မတ်လ ၂၁ ရက်နေ့က ထောင်နှစ်နှစ်၊ ၂၀၂၂ ဒီဇင်ဘာ ၂၆ ရက်နေ့မှာ နောက်ထပ်ထောင်ဒဏ်ငါးနှစ် ချမှတ်ခဲ့တာပါ။

အလားတူ ဒါရိုက်တာစတီးဟာလည်း ဖေ့စ်ဘွတ်လူမှုကွန်ရက်မှာ သတင်းတွေကိုမျှဝေမှုနဲ့ ပြီးခဲ့တဲ့ ၂၀၂၃ မတ်လ ၂၀ ရက်နေ့ကတည်းက အဖမ်းခံခဲ့ရတာပါ။ ဒီနေ့မှာတော့ စစ်ကောင်စီရဲ့ လွတ်ငြိမ်းသက်သာခွင့်အမိန့်နဲ့အတူ ပြန်လည်လွတ်မြောက်လာပြီလို့ သူ့ရဲ့လုပ်ဖော်ကိုင်ဖက်တွေက ဖေ့စ်ဘွတ်လူမှုကွန်ရက်တွေကနေတစ်ဆင့် ရုပ်သံဗီဒီယိုတွေနဲ့ အသိပေးထားပါတယ်။

စစ်ကောင်စီက ဧပြီလ ၁၇ ရက်နေ့မှာကျရောက်တဲ့ မြန်မာနှစ်ဆန်းတစ်ရက်နေ့မှာ နိုင်ငံတစ်ဝန်းအကျဉ်းထောင်တွေက အကျဉ်းသူ၊ အကျဉ်းသား ၄၈၉၃ ဦးကို နောက်တစ်ကြိမ်ပြစ်မှုကျူးလွန်ရင် လက်ရှိကျန်ရှိနေတဲ့ ပြစ်မှုတွေအတွက်ပါ တပါတည်းထပ်မံကျခံရမယ်ဆိုတဲ့ခံဝန်ကတိနဲ့ လွတ်ငြိမ်းသက်သာခွင့်ပြုကြောင်း ကြေညာထားပါတယ်။