ပူတာအိုမြို့နယ် မူလာဒီကျေးရွာမှာ ဆင်တစ်ကောင်သောင်းကျန်းလို့ အမျိုးသမီး ၄ ဦး သေဆုံးခဲ့ရတယ်လို့ KNG က စုံစမ်းသိရပါတယ်။

သေဆုံးသူတွေဟာ အသက် ၈၀ ကျော်အရွယ်အမျိုးသမီး ၃ ဦးနဲ့ အသက် ၃၀ ကျော်အရွယ်အမျိုးသမီးတစ်ဦးတို့ဖြစ်ပြီး အဲ့ဒီထဲမှာ လီဆူအဆို‌တော် ယော်တီဖာရဲ့ မိခင်ပါသေဆုံးခဲ့ရတာဖြစ်ပါတယ်။

လီဆူသရုပ်ဆောင်ယော်တီဖာက“ကျနော့အမေလည်းအဲ့ဒီဆင်ကြောင့် အမေရော၊ အမေရဲ့သူငယ်ချင်းအသက်ရွယ်တူတစ်ယောက်လည်း နှစ်ယောက်လုံး ဆုံးသွားပြီကြားတော့။ အဲ့တာသေချာသွားပြီ။ ရွာဘုရားကျောင်းဘက်မှာလည်းအဘွားအိုတစ်ယောက်အသတ်ခံရတယ်ဆိုပြီး သတင်းကြားတယ်”လို့ KNG ကိုအတည်ပြုပါတယ်။

ဖြစ်စဥ်ကတော့ ဧပြီလ ၁၆ ရက်နေ့မှာ မကြာခင်ကျရောက်မယ့် အီစတာပွဲတော်နေ့လို့ခေါ်တဲ့ ခရစ်တော်ရှင်ပြန်ထမြောက်ပွဲတော်အတွက် ထမင်းထုပ်ဖို့ ရွာနဲ့မလှမ်းမကမ်းမှာဖက်ရွက်သွားခူးရာကနေ အသက် ၃၀ ကျော်အရွယ်အမျိုးသမီး ကနဦး သေဆုံးခဲ့ရခြင်းဖြစ်တယ်လို့ သိရပါတယ်။

အဲ့ဒီနောက် ဧပြီလ ၁၇ ရက်နေ့ညပိုင်းမှာတော့ မူလာဒီကျေးရွာထဲ အဲ့ဒီဆင်ကဝင်ရောက်ပြီးသောင်းကျန်းခဲ့ပြန်တာကြောင့် ယော်တီဖာရဲ့မိခင်ဖြစ်သူအပါအဝင် ၃ ဦးထပ်မံသေဆုံးခဲ့ရတာလို့ သိရပါတယ်။

“သေဆုံးတာကျတော့ ပထမတစ်ယောက်က ရှင်ပြန်ထမြောက်ပွဲအတွက် ဖက်ရွက်လိုက်ရှာရင်းအသတ်ခံရတာတစ်ယောက်။ မနေ့ညကကျတော့ ရွာမှာရောက်လာတာ။ အဲ့ဒီဆင်က။ ရွာထဲမှာမနေ့ညကလာပြီး သတ်ခံလိုက်ရတာက သုံးယောက်။ မိန်းမတွေအဖွားတွေပဲ။ အသက် ၃၀ ကျော်မိန်းကလေး တစ်ယောက်တော့ပါတယ်” လို့ နောက်ထပ် ‌ဆင်တိုက်ခိုက်ခံရလို့ သေဆုံးသွားတဲ့မိသားစုဝင်အမျိုးသမီးတစ်ဦးပြောပါတယ်။

ဒါ့အပြင် မူလာဒီကျေးရွာအတွင်းရှိတဲ့နေအိမ်တစ်ချို့လည်းပျက်ဆီးခဲ့ရပြီး ကျေးရွာထဲအခုလိုဝင်ရောက်သောင်းကျန်းခဲ့တဲ့ ဆင်ဟာ ဆင်ရိုင်းမဟုတ်ဘူးလို့ ဒေသခံတွေကဆိုကြပေမဲ့ KNG က သီးခြားအတည်ပြုနိုင်ခြင်းတော့မရှိသေးပါ ဘူး။

ဖြစ်စဥ်ဖြစ်ပွားခဲ့တဲ့ မူလာဒီရွာဟာ ပူတာအိုမြို့ရဲ့အထင်ကရနေရာဖြစ်တဲ့ မူလာရှီးဒီးကြိုးတံတားရှိရာကျေးရွာရဲ့ တစ်ဖက်ကမ်းမှာဘဲတည်ရှိတဲ့ကျေးရွာဖြစ်ပါတယ်။

ကချင်ပြည်နယ် ပူတာအိုမြို့နဲ့ တနိုင်းမြို့တွေမှာ အခုလိုဆင်အန္တရာယ်ကြောင့် ဒေသခံတွေမကြာခဏသေဆုံးရလေ့ရှိပြီး ပြီးခဲ့တဲ့ မတ်လ ၁၂ ရက်နေ့ကလည်း တနိုင်းမြို့နယ် လမုန်ကျေးရွာမှာ မုန်ယိုနေတဲ့အိမ်မွေးဆင်ထီးတစ်ကောင် သောင်းကျန်း လို့ အမျိုးသား ၃ ဦးသေဆုံးခဲ့တဲ့ ဖြစ်စဉ်ရှိခဲ့ပါတယ်။

By – အမိုး