ဧရာဝတီတိုင်းမ်
ဧပြီ ၁၈ ရက်

ဧရာဝတီတိုင်း၊ လေးမျက်နှာမြို့နယ်နှင့် အဂ်ပူမြို့နယ်အစပ်တွင် စစ်ကောင်စီတပ်နှင့် တော်လှန်ရေးအင်အားစုများကြား တိုက်ပွဲပြင်းထန်ခဲ့ကာ စစ်ကောင်စီက အကျအဆုံးများစွာဖြင့် ခံစစ်နောက်ဆုတ်သွားကြောင်း ဒေသခံများထံက သိရသည်။

အဂ်ပူမြို့နယ်နှင့် လေးမျက်နှာမြို့နယ်အစပ်ရှိ ဝါးတောကွင်းကျေးရွာ အပါအဝင် ပုသိမ်- မုံရွာကားလမ်းအနောက်ဘက်တစ်ကြောကို AAနှင့် တော်လှန်ရေးတပ်ဖွဲ့များ ထိန်းချုပ်ထားပြီး ဧပြီ၁၇ ရက်နေ့ညတွင် ပန်းတောကြီးကျေးရွာကို ထပ်မံသိမ်းယူခဲ့ကြောင်း သိရသည်။

” ပန်းတောကြီးမှာ စစ်ကောင်စီဘက်က ၅၀ ကျော်ကျတယ်။ အချို့တွေဆို ယူနီဖောင်းတွေချွတ်ပြီး ထွက်ပြေးကြတာ။ အခုတော့ဆီဆုံကုန်းရွာဘက်မှာ ခံစစ်ပြန်ပြင်နေတယ်” ဟု ဒေသခံတစ်ဦးက ဧရာဝတီတိုင်းမ်ကို ပြောသည်။

ယမန်နေ့ ဧပြီ ၁၇ရက်နေ့က ပိန္နဲကွင်း (ဂပြိုတောင်)မှနေ၍ စစ်ကောင်စီက လက်နက်ကြီးများဖြင့် အဆက်မပြတ်ပစ်ခတ်တိုက်ခိုက်နေကြောင်း သိရသည်။

“ဝါးတောကွင်းတလျှောက်ထိန်းချုပ်လိုက်တော့ စစ်တပ်က ရှေ့ဆက်မတိုးရဲတော့ဘူး။စစ်တပ်က ပိန္နဲကွင်းကနေ မနေ့ကရော တနေ့ကရော နှစ်ရက်ဆက်တိုက် လက်နက်ကြီးတွေနဲ့ပစ်နေတယ်” ဟု သတင်းရင်းမြစ်က ဧရာဝတီတိုင်းမ်ကိုပြောသည်။

ပိန္နဲကွင်း၊ ပဒတ်ကုန်း၊ တောနေစမ်း အနီး ဂေါက်ကွင်းနေရာများတွင် စစ်ကောင်စီက တပ်စွဲနေရာယူထားကြောင်း သတင်းရင်းမြစ်တစ်ဦးက ဆိုသည်။

ယမန်နေ့ ဧပြီ ၁၇ရက်နေ့က လေးမျက်နှာမြို့အစပ် ယိုးဒယားကွင်းနှင့် ကြပ်ကြီးဘက်သို့ ဂျက်ဖိုက်တာ၊ Mi 35ရဟတ်ယာဉ်တို့ဖြင့် စစ်ကောင်စီက မီးလောင်ဗုံးများဖြင့် ကြဲချတိုက်ခိုက်ခဲ့သည်။

လေကြောင်းတိုက်ခိုက်မှုအပြီး အဆိုပါကျေးရွာများတွင် ဖုန်းလိုင်း အဆက်အသွယ်များပြတ်တောက်သွားပြီး ဒေသခံများအခြေအနေကို မသိရှိရသေးကြောင်း ကူညီကယ်ဆယ်ရေးလုပ်ဆောင်နေသူများက ပြောသည်။

ဓာတ်ပုံ-AYA PDF အမှတ် ၂၉ ဗျူဟာ
#လေးမျက်နှာမြို့ #ကျေးရွာအချို့ #ပန်းတောကြီး#AA #တော်လှန်ရေးတပ် #ထိန်းချုပ် #စစ်ကောင်စီ #လေကြောင်း #တိုက်ခိုက် #Ayeyarwaddy_Times

The post ဧရာဝတီတိုင်း လေးမျက်နှာမြို့နယ်အတွင်းတွင် တိုက်ပွဲပြင်းထန်ခဲ့ပြီး စစ်ကောင်စီဘက်မှ ၅၀ ကျော်ကျဆုံးကာ ခံစစ်နောက်ဆုတ်သွား appeared first on Ayeyarwaddy Times.