၄ နှစ်အတွင်း CNO/CNDF တပ်ဖွဲ့ဝင် ၉၁ ဦးကျဆုံး

(004SS)

ချင်းအမျိုးသားအဖွဲ့ချုပ် CNO/CNDF တည်ထောင်ခြင်း ၄ နှစ်ပြည့်အထိမ်းအမှတ်အနေဖြင့် ဖလမ်းမြို့သိမ်းစစ်ဆင်ရေး မစမီက ဖမ်းဆီးရမိထားသော စစ်သုံ့ပန်း ၁၀ ယောက်ကျော် လွတ်ငြိမ်းချမ်းသာခွင့်ပေးလိုက်သည်ဟု သိရသည်။

ဖလမ်းမြို့နယ်တွင် အခြေပြုလှုပ်ရှားနေသော ချင်းအမျိုးသားအဖွဲ့ချုပ် CNO/CNDF သည် စစ်အာဏာရှင်စနစ်ဆန့်ကျင် တော်လှန်ရေးနှင့် ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် ၂၀၂၁ ခုနှစ် ဧပြီလ ၁၃ ရက်နေ့တွင် စတင်ဖွဲ့စည်းခဲ့ကြပြီး ယမန်နေ့က ၄ နှစ်တင်းတင်ပြည့်မြောက်ခဲ့ပြီဖြစ်သည်။

ဧပြီလသည် CNO/CNDF တည်ထောင်သည့် လဖြစ်သည့်အပြင် ဖလမ်းမြို့အပါအဝင် စစ်ကောင်စီစခန်းများသိမ်းပိုက်နိုင် သည့် ‌လဖြစ်ပြီး ၎င်းတို့အတွက် မဂ်လာရှိသော လဖြစ်သောကြောင့် မြို့သိမ်းတိုက်ပွဲမတိုင်မီ ဖမ်းဆီးရမိသော စစ်သားနှင့် ရဲ ၁၅ ယောက်အား လွတ်ငြိမ်းချမ်းသာခွင့်ပေးခဲ့သည်ဟု CNO/CNDF ပြောရေးဆိုခွင့်ရှိသူ ဆလိုင်းတီမီက ပြောသည်။

“ကျွန်တော်တို့အတွက် ဒီလ (ဧပြီ) ဟာဆိုလို့ရှိရင် တကယ့်ကို မဂ်လာရှိတဲ့ လပါ။ ဘာဖြစ်လို့လဲ ဆိုတော့ ကျွန်တော်တို့ အဖွဲ့အစည်းတည်ထောင်တာကလဲ ဧပြီ ၁၃ ရက်နေ့ဖြစ်တယ်။ ပြီးတော့ ကျွန်တော်တို့ ပထမအကြိမ် ဗာရ်းစခန်း သိမ်း ပိုက်ရရှိတာကလဲ ဧပြီ ၁၀ ရက်နေ့ ၂၀၂၃ ခုနှစ်မှာ ဖြစ်တယ်။ အခုတခါ ခလရ ၂၆၈ သိမ်းပိုက်ရရှိတာကလည်း ဧပြီလ ၉ ရက်နေ့ဆိုတော့ တကယ်ကို မဂ်လာရှိတဲ့လ ဖြစ်ပါတယ်။ ကျွန်တော်တို့ ထုတ်ပြန်ချက်မှာ ရှိသလိုပဲ ကျွန်တော်တို့ လွှတ်ပေးတာက ၁၅ ယောက်လောက်ပါ။ အထူးသဖြင့် ဖလမ်းမြို့သိမ်းမတိုင်ခင်က ဖမ်းထားတဲ့ စစ်သားနဲ့ ရဲတွေပါ။ အမျိုးသမီးနဲ့ ကလေးတွေမပါပါဘူး” ဟု ဆလိုင်းတီမီက ပြောသည်။

လက်ရှိတွင် ဖလမ်းမြို့သိမ်းတိုက်ပွဲအတွင်း ဖမ်းဆီးထိန်းသိမ်းထားသော စစ်သား၊ ရဲ အပါအဝင် ၎င်းတို့၏ မိသားစုဝင် အမျိုးသမီးနှင့် ကလေး စုစုပေါင်းစစ်သုံ့ပန်း ၃၀၀ ဝန်းကျင်ကို ဆက်လက်ထိန်းသိမ်းထားဆဲ ဖြစ်ကြောင်း ဆလိုင်းတီမီက ဆိုသည်။

၎င်းတို့ကို စစ်သုံ့ပန်းဥပဒေနှင့်အညီ လုံခြုံသောနေရာတွင် ထိန်းသိမ်းထားပြီး တရားဥပဒေနှင့်အညီ ဆက်လက်ဆောင်ရွက် ရန်ရှိကြောင်းလည်း သိရသည်။

“သူတို့ထဲမှာ ဒါဏ်ရာရထားတဲ့သူတွေလဲရှိပါတယ်။ သူတို့ကို ဆေးကုသမှုခံယူခိုင်းပါတယ်။ နောက် လူသားချင်းစာနာခြင်း အရ အားလုံးကို တန်းတူဆက်ဆံပါတယ်။ လက်ရှိမှာတော့ လုံခြုံတဲ့နေရာမှာ ထိန်းသိမ်းထားပါတယ်။ စစ်သုံ့ပန်းဆိုတဲ့ အရာမှာ ၃ ပိုင်းရှိတာပေါ့နော်။ ပထမအချက်က စစ်ပွဲနဲ့ တိုက်ရိုက်မသက်ဆိုင်တဲ့သူတွေ (ဉပမာ စစ်သားရဲ့ မိသားစု၊ အမျိုးသမီး၊ သား၊သမီး) တွေပါမယ်။ နောက်တစ်ချက်က လက်နက်ချ အညံ့ခံတဲ့လူတွေ။ နောက် လက်နက်မချဘဲနဲ့ ဖမ်းဆီးရမိတဲ့သူတွေဆို‌ပြီးတော့ ၃ မျိုးရှိတယ်။ အဲဒီအပေါ်မှာ တရားဥပဒေနဲ့အညီ ဆောင်ရွက်သွားဖို့ရှိပါတယ်” ဟု CNO/CNDF ပြောရေးဆိုခွင့်ရှိသူက ပြောသည်။

CNO/CNDF အနေဖြင့် တော်လှန်ရေး (၄) နှစ်တာကာလအတွင်း အမျိုးသားလွတ်မြောက်ရေးအတွက် တိုက်ပွဲပေါင်း (၁၇၀) ကျော် ပါဝင်ဆင်နွှဲခဲ့ပြီး CNO/CNDF တစ်ဖွဲ့တည်းဆင်နွှဲခဲ့သော စခန်းသိမ်းတိုက်ပွဲ (၂) ကြိမ်အပါအဝင် စခန်းသိမ်း တိုက်ပွဲပေါင်း (၁၃) ကြိမ်ရှိခဲ့ကြောင်း သိရသည်။

ထိုတိုက်ပွဲများအတွင်း CNO/CNDF တပ်ဖွဲ့ဝင် (၉၁) ဦးကျဆုံးပြီး (၆၃) ဦး မသန်စွမ်းဖြစ်ခဲ့ရသည်ဟု ၎င်းတို့၏ ထုတ်ပြန်ချက်တွင် ဖော်ပြထားသည်။

စစ်ကောင်စီကင်းစင်ပြီဖြစ်သော ဖလမ်းမြို့နယ်တစ်ခုလုံးတွင် ဖက်ဒရယ်ဒီမိုကရေစီစနစ်ကို အခြေခံသော ပြည်သူ့အုပ်ချုပ်ရေးလုပ်ငန်းများကို စနစ်တကျ အကောင်ထည်ဖော်ရန် ဦးစားပေးဆောင်ရွက်သွားမည်ဟုလည်း CNO/CNDF က ပြောသည်။

စစ်ရေး၊ နိုင်ငံရေး ရည်မှန်းချက်ခြင်းတူညီသော ချင်းညီနောင်နှင့်လက်တွဲကာ ချင်းပြည်တခွင်လုံး စစ်ကောင်စီ ကင်းစင်ရေးမှတဆင့် ပြည်ထောင်စုတဝန်းလုံး စစ်ကောင်စီကင်းစင်ရေးလုပ်ငန်းများတွင် ဆက်လက်၍ တက်တက်ကြွကြွ ပူးပေါင်းပါဝင်သွားမည်ဟု ဆိုသည်။

ချင်းပြည်စုစည်းတည်ထောင်နိုင်ပြီး ဖက်ဒရယ်ပြည်ထောင်စုကြီးပေါ်ပေါက်လာရေးအတွက်လည်း ICNCC, NUCC, CRPH, NUG တို့နှင့် ဆက်လက် ပူးပေါင်းဆောင်ရွက်သွားမှာဖြစ်ပြီး ရင်ဘတ်ချင်းတူသော တိုင်းရင်းသားလက်နက်ကိုင်အဖွဲ့ (EROs, EAOs) များနှင့် ပိုမိုခိုင်မာစွာပူးပေါင်းဆောင်ရွက်သွားမည်ဟုလည်းဖော်ပြထားသည်။

ချင်းအမျိုးသားများ၏ အကျိုးစီးပွားကာကွယ်ရန်နှင့် ဖက်ဒရယ်ပြည်ထောင်စုကြီး ပေါ်ထွန်းလာရေးအတွက် ပူးပေါင်းထိုက်သူများနှင့် အတူပူးပေါင်းညှိနှိုင်းရန် အမြဲအဆင်သင့်ရှိသကဲ့သို့ မတရားအုပ်ချုပ်သည့် စစ်ကောင်စီအပါအဝင် မည်ကဲ့သို့သော အာဏာရှင်မျိုးကိုမဆို အဆုံးတိုင် တွန်းလှန်ချေမှုန်းသွားရန် အမြဲအသင့်ရှိနေကြောင်း CNO/CNDF ၏ ၄ နှစ်ပြည့် ထုတ်ပြန်ချက်တွင် ဖော်ပြထားသည်။