စစ်ကောင်စီဘက်မှ ထိခိုက်ကျဆုံးမှု များပြားဟုဆို

(006SV)

မကွေးတိုင်း၊ မင်းလှမြို့နယ်၊ ဧရာဝတီမြစ်အနောက်ခြမ်း၊ ပုသိမ်- မုံရွာ ကားလမ်းမအနီးတဝိုက်တွင် PDF ၊ CDF မဟာမိတ် ပူးပေါင်းတပ်ဖွဲ့နှင့် စစ်ကောင်စီတို့ကြား တိုက်ပွဲများ ဖြစ်ပွားခဲ့ပြီး စစ်ကောင်စီမှ ထိခိုက်သေဆုံးမှု များပြားကြောင်း သိရသည်။

စစ်ကောင်စီတပ်များသည် မင်းလှမြို့နယ်အတွင်းရှိ ကပစမှ အင်အားများ စုဖွဲ့၍ ပုသိမ်- မုံရွာလမ်းမအနီးဝန်းကျင်က ကျေးရွာ များနှင့် အနီးတဝိုက်ကို ဧပြီလ ၁၂ ရက်မှ စတင်၍ စစ်ကြောင်းထိုးလာသောကြောင့် ဧပြီလ ၁၄ ရက်အထိ မဟာမိတ်ပူးပေါင်း တပ်ဖွဲ့နှင့် တိုက်ပွဲများ ဖြစ်ပွားခဲ့သည်ဟု သိရသည်။

စစ်ကောင်စီ၏ စစ်ကြောင်းများကို ပြည်သူ့ကာကွယ်ရေးတပ်ဖွဲ့ (အထက်မင်းလှ)၊ အရှိုချင်းကာကွယ်ရေးတပ် (ACDF) နှင့် ပြည်သူ့လွတ်လပ်ရေးတပ်တော် (PIO/PIA) တို့၏ မဟာမိတ်ပူးပေါင်းတပ်ဖွဲ့က ဖြတ်တောက် တိုက်ခိုက်ခြင်းနှင့် တန်ပြန် တိုက်ခိုက်ခြင်းများ ဆောင်ရွက်ခဲ့သည်ဟု ယင်းအဖွဲ့က ဧပြီလ ၁၇ ရက်မှာ ထုတ်ပြန်သည်။

စစ်ကောင်စီ၏ စစ်ကြောင်းများကို လက်ခံပူးပေါင်း၍ ဆောင်ရွက်သော နယ်ခံတပ်စခန်းဖြစ်သည့် မင်းလှမြို့နယ်၊ ရှမ်းတပ်ကြီး တိုက်နယ်ရဲစခန်းကိုလည်း သတိပေးဟန့်တား တိုက်ခိုက်မှုများ ပြုလုပ်ခဲ့သည်ဟု သိရသည်။

တိုက်ပွဲများအတွင်း စစ်ကောင်စီတပ်မှ ၁၀ ဦးထက်မနည်း သေဆုံးပြီး ၃၀ ဦးခန့် ပြင်းထန်ဒဏ်ရာများ ရရှိခဲ့ကြောင်း၊ မဟာမိတ်ပူးပေါင်းတပ်ဖွဲ့က အထိအခိုက်အကျအဆုံး မရှိခဲ့ကြောင်း ထုတ်ပြန်သည်။

ထိတွေ့တိုက်ပွဲများနှင့် ပတ်သက်၍ အရှိုချင်းကာကွယ်ရေးတပ် (ACDF) ကို ဆက်သွယ်မေးမြန်းသော်လည်း မရသေးပါ။

စစ်ကောင်စီတပ်သည် မင်းလှမြို့နယ်အတွင်း ပုသိမ်- မုံရွာလမ်းဘေးက ကျေးရွာများနှင့် အနီးဝန်းကျင်ကို မြေပြင်စစ်ကြောင်း များထိုးလာပြီး ဒရုန်းများဖြင့်ပါ တိုက်ခိုက်မှုများ ပြုလုပ်ခဲ့သည်ဟု သိရသည်။

စစ်ကောင်စီသည် စစ်ကြောင်းထိုးစဉ် ပြည်သူလူထု ပိုင်ဆိုင်မှုများ ယူခြင်း၊ ပေါ်တာဆွဲပြီး ငွေကြေးဖြင့် ပြန်လည် ရွေးယူ စေခြင်းများ လုပ်ဆောင်ခဲ့သည်ဟု မဟာမိတ်ပူးပေါင်းတပ်ဖွဲ့၏ ထုတ်ပြန်ချက်တွင် ဖော်ပြထားသည်။

ပြည်သူလူထုအနေဖြင့် လုံခြုံရေးအသိ သတိဖြင့် ကြိုတင်ပြင်ဆင်နိုင်ရန်ကိုလည်း မဟာမိတ်ပူးပေါင်းတပ်ဖွဲ့က သတိပေးနှိုးဆော်ထားသည်။